今日係我20歲嘅陽曆生日，亦都係第一次冇同屋企人一齊嘅生日。

其實由前幾年開始就冇咗咩生日嘅感覺。不過點講都係第一次要自己度過嘅生日，仲係有啲掛住屋企人~~~但係媽咪話，佢唔幫我慶祝喎，話要等到我陰曆生日先。都係嘅，我廿年嚟都係過嘅陰曆生日。

前兩日去咗duesseldorf搵屋，行咗成兩日，睇咗幾個地方，唔係太貴，就係條件唔好，總之就係冇搵到啱嘅，除咗一個apartment，條件都幾好，仲有咗陽台添，唔包電273，加埋電費網費一個月要300多。雖然我自己有啲鍾意，但係個hausameister竟然話如果我唔租2年嘅話就唔係好想租畀我。最後都係無定。

呢次去，除咗學校啲材料問題解決咗，其它咩都冇搞掂，而且仲搞到自己張銀行卡畀吞咗添~~~星期一要去攞啲錢，點知張卡唔知點解就畀吞咗。第二日去櫃檯度，佢check咗好耐，先同我講，我張卡已經壞咗，要等三日，佢send張新卡畀我......

今朝早1點幾返到luebeck，對腳幾乎跛咗，連續行咗兩日路，唔跛都奇喇~~~瞓到7點幾就醒咗，matthias見到我同我講咗生日快樂，其實真係一啲生日嘅感覺都冇。後尾佢同梁講咗，梁話要叫jk姐過來食飯喎。唔係好想搞，不過後來佢都係叫咗佢過來。

星期六又要再過去搵屋，希望早啲搵到喇，如果唔係啲路費都好貴呀~~~

噚日同matthias去買咗油牆嘅油漆，都唔算太貴，全部嘢用咗26€。

今日同佢仲有佢嘅一個朋友將我間房由頭到尾油咗一次，9點就開始，12點半先搞掂，不過已經畀我想像嘅要快咗喇。油完佢話，要等8個鐘先得，我點等得咁耐啫，同佢話，6個鐘差唔多喇！佢話，都得，6點就幫我將啲嘢搬番入我間房。

聽日要去duesseldorf搵房，呢幾日打咗電話聯絡咗幾個，不過好多都已經租咗出去。希望星期二返黎嘅時候能夠帶個好消息返黎啦......

今朝早七點半醒咗，食完早餐8點幾。matthias噚日叫我9點同佢一齊將kelle啲嘢執咗，點知佢9點先係度食早餐。

9點半左右開始執嘢。住咗咁耐，第一次去keller，好多蜘蛛網同埋我最憎嘅蜘蛛！！佢清咗好多嘢出來，聽佢講先知，個keller已經最少有2年未清理過。2年幾冇執，點解我話要搬走你就要執，當我免費勞工呀?!將啲垃圾執咗出來之後，將啲電器之類嘅攞去1km外嘅回收站，走咗三次！跟著又將啲紙箱攞去街上嘅垃圾箱，又行咗三次！等到全部搞掂，已經一點喇~~~

唔知點解，今日越諗越覺得唔憤，點解之前個中國女生走嘅時候咩都唔使做，連間屋都冇執。但係而家我要走就咩都要做，除咗幫佢執keller，我仲要去買油漆嚟油牆。唔通我前世欠咗佢嘅咩??同媽咪視像嘅時候話畀佢聽，佢話，無解啦，一個人係出邊，忍得就忍下啦，如果啲油漆唔係好貴就算數，如果貴得濟就同matthias商量下。唉~~同佢商量，我直頭想即刻搬走，咩都唔理佢呀！！！

食完晚飯練咗半個嚟鐘琴，唔知點解，心情唔好就想練琴！跟著去超市買水，順便去車站買咗火車票，不過係由duesseldorf返黎呢度嘅票。星期日用wochenendekarte就好，嗰個係最平嘅，都冇搵到29€嘅票。諗到學校嘅嘢就好煩，啲材料都唔知點解佢哋未收到，好驚要我返去重新辦過，咁好晒時間唔講，我仲驚會過咗報到嘅時間，咁就慘喇！仲有個邊嘅房，噚日有搵到一個中國人要租屋，佢話今日會打畀我，但係等到而家都冇打來，聽日要打過去問下先。千祈唔好話畀人租咗，咁我隨時會死架，而家剩番一個星期，真嘅好煩......

今朝早等到10點半，但係到未收到學校嘅E-Mail，打咗電話過去，我搵個人唔係度，另外一個人接咗電話，佢竟然話仲未收到我啲材料喎。而家唯有等之前嗰個人上班喇，而且仲希望佢已經收到咗。跟著打咗幾個電話問租房嘅，點知噚日睇個四個全部已經租咗出去！！激死......

12點畀小韓叫過去幫佢搬嘢，搬到UNI個邊一個朋友度。點知搬完個天就開始落雨，而且仲好大添~~等咗好耐，等到雨唔係好大我哋先返黎。好激氣嘅係，等我哋返到市中心嘅時候，雨停咗不但止，而且仲出咗好大嘅太陽！！

返到屋企沖咗個涼，見到matthias同佢講咗我要搬嘅事。我諗住話，我先交咗8月成個月嘅租金，跟著佢搵個人由8月15號接手，如果搵到嘅話，佢退番半個月嘅租金畀我，佢話冇問題喎~~~

到咗夜晚，佢又搵我，問我幾時得閒。佢要同我一齊去買啲油漆返黎，跟著要我將我間屋嘅牆油漆一次。而且啲錢仲要我畀喎！！之前個人走嘅時候咩都冇搞，間屋就咁好亂留畀我，而家我要搬就要我將牆油一次，諗諗覺得好過份，好勞氣！！不過冇解，真嘅唔想臨走前仲同佢哋搞到關係唔好。呢幾日真係有得忙！！

下晝係網上搵到一個中國人，佢都要係duesseldorf租屋。佢話聽日會同屋主簽約，咁我下個星期就可以過去睇，如果啱嘅話就可以定咗~~一個月應該會係300€左右。晏啲又係網上睇到另外一個租房嘅，打過去佢話間房仲未租出去，要我下個星期如果過咗去再打電話畀佢約時間去睇房。個邊住嘅地方終於有咗啲眉目~~希望跟著都一切順利！！

今日收到duesseldorf嘅信喇！！北京個朋友同我講，話佢已經收到咗，我即刻落樓去check信箱，果然見到有我嘅信。當時見到好大一封，仲以為係將我啲報名嘅材料寄咗返黎添，拆開咗發現唔係喎，入面有好多張紙，攞出黎一睇，係我恨咗好耐嘅zulassung!!

返到嚟超激動~~恨咗咁耐，終於算係有啲結果喇！！

不過睇真啲，入面好多嘢我都唔係好明，打畀JK姐，約咗今晚去佢度，佢幫我睇下。

下晝係網上同媽咪視像講咗呢個消息畀佢知，佢勁開心！！而且即刻打電話畀啲舅父同埋阿姨佢哋，佢哋到好開心。其實恨咗咁耐，就係想見到媽咪開心啫~~我仲叫佢聽日要買啲嘢去酬神添。呢排真嘅覺得呢點嘢好有用嘅~~

晏啲去咗JK姐度，佢幫我睇哂啲信，發覺又有大把嘢要愁。上次已經寄咗畢業證書同埋APS過去喇，但係呢次有問我要，而且仲有個咩bachelor嘅嘢，連JK姐都唔知係咩。聽日同學校聯絡下先。不過最麻煩嘅仲係B2嘅證書，唔知點算，唉~~~

返黎係網上睇咗duesseldorf嘅房，都好貴，200幾300€一個月。睇來個度嘅消費真係高到冇得頂！！

聽日先去攪掂嘅visum先，希望一切順利喇~~~

而家心情好複雜呀~~~

今日寫咗封e-mail畀duesseldorf同埋mannheim嘅學校，問考試結果嘅。不過今日佢哋冇返工，要等到聽日先有回信。好期望，期望呢兩個學校嘅回信。但係亦都好擔心，好驚，我驚等到嘅唔係我想要嘅結果呀......今日有啲提心吊膽。

噚晚2點幾，終於返到luebeck，好攰呀~~計下，6號走嘅，15號先返黎，第一次走咗咁耐！

呢幾日都幾奔波嘅。先去咗duesseldorf一日，跟著去mannheim住咗5日，跟著又返到duesseldorf住咗2日。原本冇諗住出去咁耐，但係duesseldorf嘅專業過咗，要14、15號再去考其它嘅嘢，所以就有多住咗幾日。不過好彩，係duesseldorf識咗一個北京嚟嘅朋友，係mannheim嘅幾日好彩有佢，如果唔係真唔知上個星期日點過。

duesseldorf嘅專業考試唔知點解，入去就好緊張，連手都震埋，不過最後竟然過咗，而且仲有個pro.要咗我。視唱好簡單，樂理唔知點樣，因為好多嘢唔係好明，而且國內學嘅同呢度仲有啲唔同。鋼琴考得都ok。而家就希望有位置畀我囉！！

mannheim嘅考試麻麻哋，覺得同上次相比，有好有差。專業嘅音樂表現得多咗，但係paganini拉得唔係幾好，其它都ok。

今日返黎就有大把嘢做，幫小韓辦咗visum嘅嘢，走咗3次，最後都算搞掂咗。仲係好眼瞓~

噚日考咗專業，一共40個人，我排係第31個，下晝3點幾先到我。

入咗去覺得，入邊好凍呀，因為入邊開咗冷氣。mozart拉得都算OK，有做音樂，不過有一個takt左手唔知點解冇跟上，乾脆就混咗過去。bach應該算最正常嘅啩，冇咩毛病，應該都冇咩特色啩?!paganini拉得唔係幾好，自己覺得冇上次考試好......視奏唔係冇難，前幾行仲講得過去，後面嘅就有啲~~~

今日考鋼琴同埋樂理。

鋼琴依然唔係幾好，之前明明練得好好哋，但係入去見到琴鍵個腦就一片空白！！斷咗幾次。樂理視唱可能係考過一次嘅關係，覺得唔係好難，定係話呢排我嘅樂理視唱有進步??

下晝考完我就同北京個朋友一齊去行街。啱啱好有嗰pop嘅比賽，成條街都係人，我哋都去睇咗下。跟著就去mcdonald's度買啲嘢食，坐咗個嚟鐘，後來又去超市買咗啲水，因為聽日超市唔開門。返到DJH去佢間屋傾偈，佢間屋就得佢一個，超勁。傾咗成個鐘我就返房喇。

講嚟都奇怪，今次考試識咗好多人，而且都係我自己一個出嚟嘅時候識嘅！聽日都唔知點過，到處都唔開門......後日去duesseldorf，希望一齊順利！

噚晚未到10點就熄燈瞓覺，朝早6點半聽到手機響就醒咗。

八點三未到就到咗學校，琴房有開，而且冇咩人。霸咗嗰琴房就開始練。9:22嘅時候有個中國人話就要考試喎，唔就畀咗間琴房佢練先，過咗一陣返去，發覺又有另外一個中國人係入面，佢11點半考試喎，算數，畀佢繼續練，我繼續去踩馬路。

講來又幾奇怪喎，食早餐嘅時候就開始落雨，等我到咗學校就開始落暴雨，但係等到我要去踩馬路嘅時候就停咗喎~~~呢幾日因為落雨嘅關係，我對鞋都有陣發霉嘅味，麻煩！

11點半返去，終於冇人喇。繼續練，專業同鋼琴一齊練。等到快2點嘅時候，實在唔想練，就將琴放返旅社，跟著繼續去行街。不過係5點幾個陣行過學校前面，撞到前幾日係duesseldorf識嘅個北京女仔，而且佢同我住一間旅社添。睇來呢幾日有伴啦，唔使驚悶！

噚晚快1點先瞓，但係今朝6點半就自己醒咗。食完早餐之後，行去超市買咗支水，跟著返到房hea到10點半過先去check out，又係火車站等咗個嚟鐘。

由早晨醒咗之後，個天一直係落雨，而且仲唔細添。好彩我去火車站個陣冇落，如果唔係我就慘喇，又冇帶遮喎！坐上火車，一路上亦都落緊雨，不過都唔係好大，而且仲係一陣一陣咁。火車一路沿著莱茵河開，到咗mannheim，好熟就搵到住嘅地方。要咗間人少嘅房，係頂樓，都幾好，至少畀上次住嘅個間好啲。入去嘅時候仲冇人，佔咗個幾得意嘅床，好似北方個啲炕。執好嘢就去搵地方食晚飯，食咗個doener teller，勁大一碟，最後都剩番少少食唔落，花咗6€。

係出邊行到6點過先返到房，嚟咗一個德國人，佢竟然係bielefeld人，之前我仲係個度讀咗3個月德文添。傾咗陣偈，佢話我嘅德文好好，有啲小開心~~~

希望聽日學校有得練琴喇，如果唔係就會無聊死......