  |
  
|
今日已經係六月嘅最後一日，不知不覺咁，一個月又結束咗~~~~
呢排成日都自己一個人"宅"係屋度，搞到自己好似有啲抑鬱症噉。今日晏晝突然間唔知要做咩，電腦放著音樂，但係個腦就咩到唔知，淨係好想喊，跟著就對著個床同埋牆發洩咗一陣，跟著就好咗小小。到咗五點幾係網上同媽咪傾咗陣計，心情先回復返正常。
今日竟然收到carlos嘅sms，問我考試嘅情況。覺得佢真嘅好似老王，甚至之前有幾次上課嘅時候有咗種錯覺，好似返到係北京嘅日子咁......可惜喇，我以後都冇可能再嚟呢個學校喇~~~
仲有6日就要繼續踏上考試嘅旅程，前面會係點我完全唔知，唯有希望最後有個好結果喇，咁仲覺得對得住媽咪啲。
今朝10點先開個e-mail睇信，之前一直唔敢睇。不過結果係意料之中嘅，佢哋話我冇pass度個考試。晏晝小韓打電話畀我，佢pass咗muenster個度嘅專業考試啦，跟著要等下個星期一考埋其它嘢先有得返。唔知點解，佢講呢個消息嘅時候仲講咗句，第一個就打畀我。聽到嘅時候個心好似畀咩刺中咗咁，佢係笑話緊我咩??總之電話入邊我笑著應佢，講冇幾句就收線。
禍不單行講嘅就係今日嘅我。夜晚matthias話佢女友要過來喎，問我同唔同佢哋一齊食晚飯，我話已經有約，推咗。不過我邊有約啫~~~無解喇，6點過出門去行街啦。自己行到UNI個邊嘅一個超市度轉咗一圈，9點過返到嚟。返到屋見到床上有luebeck嘅信，睇都唔使睇就知唔係好消息啦。一日收到兩封話我冇Pass考試嘅信，雖然其中一個已經一早就知道咗，不過都算好夠黑仔啦！！！
今晚行返嚟嘅時候係街度見到一隻貓，全身白色嘅，對眼仲係一隻藍色一隻棕色。好似以前係汕頭養嗰隻貓，而且我行埋過去佢都唔驚，由得我摸佢。可惜我身上冇食嘅嘢，睇佢個樣好似肚餓咗。不過佢一直就企係一間屋嘅門口望著入邊，叫都唔叫，唔知咩情況?!
噚晚1點幾我啱啱瞓着咗，小韓就打畀我，話佢記起，佢應該係今日9點要坐車去muenster考試。當時就一個反應，O哂嘴~~~
今朝早7點幾醒咗一次，又係因為小韓嘅電話，佢話要我陪佢去食早餐喎。梗係推咗啦，我都未瞓夠。掛咗電話繼續瞓到9點過先醒。晏晝1點佢到咗muenster，我就通過電話做佢嘅GPS，幫佢搵到間酒店，收咗線先發現打咗成個鐘。3點過又幫佢搵到學校，10分鐘嘅路行咗半個鐘。唉~~唔知係佢考試定係我考試，酒店都係我係網上幫佢book嘅，佢連個度叫咩到唔知喎。淨係知成日同我講，啲女仔好索呀，真係唔知佢嚟呢度係想讀書定係睇女仔嘅?!冇眼睇佢......
今日成日到好緊張，好希望收到leipzig嘅信，但係等咗成日都係冇收到，夜晚寫咗封e-mail畀學校，不過睇來係冇咩希望喇~~等咗咁耐都冇消息~~~
今朝早原本諗住8點半去咗ordnungsamt問我visum嘅事，不過醒嘅時候已經8點九，9點半陪小韓去學校問完佢嘅考試結果就返嚟練琴。到咗1點半先再去，因為個陣冇咩人。
係ordnungsamt等嘅時候計咗下，原來我已經嚟咗呢個國家1年喇。舊年3月27號晚到嘅，7月初返去嘅，噉就算三個月。跟著10月3號又過咗嚟，一直到而家已經9個月過咗，咁計埋我到嚟咗一年多喇，不過到而家仲冇個穩定嘅學校，諗諗下都幾對唔住屋企人嘅~~~
今日晏晝個陣突然又有啲怪怪哋嘅感覺，呢排成日都係得我自己係屋度，個德國人成日唔知去邊，另外個中國人又成日去旅行(之前去開會開咗成個星期，今朝早又走咗，聽講係去意大利~~)。晏晝練琴嘅時候覺得，好似自己嘅人生就咁哂咗，好似冇咗目標。好耐冇咁嘅感覺喇~~~好想返去呀！！！
呢幾日到過得好正常，心情亦都好番啲，冇咁抑鬱，雖然有時仲有啲唔開心~~~不過都OK啦，自從嚟咗呢度之後，我又有幾時係真正開心嘅啫??呢幾日都有好畀心機咁練琴~~希望會有進步囉！
今日晏晝嘅時候，小韓話咗個消息畀我聽。佢問咗hamburg個私立學校嘅老師，話佢可以係佢個學校畀個platz畀我哋喎，不過最好係要係下個月15號之前搞掂啲手續，即係話，呢個月底之前要過去畀佢聽下，同埋15號之前要過啲學費畀個老師。小韓已經決定咗啦，如果luebeck呢邊冇錄取佢嘅話，佢就同個老師講要過去。佢講得輕鬆，大喇喇3500€喎，佢屋企有錢梗係冇問題喇。我真嘅要好好諗下喇，屋企而家邊有錢最畀我啫。而家唯有希望leipzig個邊會有好消息喇，或者下個月mannhaim個度有好消息。如果唔係我就真係唔知點做好喇~~~初初聽到呢個消息都有啲開心嘅，至少有條後路囉。不過呢條後路都好能行呀~~~而家唯有繼續努力啲練琴囉。相信車到山前必有路！！
自從考完試之後，小韓成日搵我出去陪佢食飯。講真喇，由佢嚟呢度之後，我嘅日常支出都多咗唔少，唔想出去都冇咩好啲嘅理由，鬼叫我家陣成日冇嘢做。
尋日打電話畀mannheim個教授，諗住約個時間過去vor下，點知佢話，佢已經識咗我啦，唔需要再搵佢，佢直接係考試嘅時候聽就好啦。唔知算好消息定係壞消息~~~
今日係小韓考試，其實好矛盾。好希望佢通過考試，因為大家都係朋友，邊個唔想朋友好嘅啫？！但係另外一方面又好唔想佢通過考試，呢個當然係自己嘅自私心搞怪，咁嘅話，個心會平衡啲囉......不過事實係，佢通過咗考試，攞到晏晝考德文同埋聽日考theorie嘅通知。攞到嘅時候佢好開心，我都好但佢開心。跟著陪佢去食lunch，佢話要請我喎~~~其實唔係好想去，同佢一齊，佢一直同我講啲考試嘅事，話佢好緊張呀，又話後面嘅考試點樣點樣。個心好痛，但係仲要笑著應佢喎，口是心非可能就係講我噉啩......
下晝好認真咁練咗陣琴，跟著就同媽咪視像傾偈。屋企隻貓而家好肥，諗諗下都九個月冇抱過佢喇，唔知佢仲識唔識得我~~~~呢幾日好突然好掛住屋企人。
噚晚10點半就瞓咗，今朝早瞓到九點至醒，有排冇瞓得咁長喇！
原本諗住今日開始繼續練琴，但係朝早練咗一個鐘就冇哂心機。之前因為一直要上課，而且覺得好有希望咁，但係而家一啲動力都冇，下晝更加完全冇練，一直係PPS上睇卡通片。覺得心好攰，亦都好驚。
12點個陣打電話畀媽咪，一開始仲OK，但係當講到話屋企只貓尋日晏晝好唔開心，媽咪話諗諗下，可能係佢知道我呢度嘅情況嘅時候，眼淚就流咗落嚟。有時真嘅覺得自己好冇鬼用，已經嚟咗差唔多一年，到而家仲咩都冇做成，而且仲成日令到屋企人傷心同埋失望。屋企人真嘅擺咗成副心機係我度，家姐亦都因為我而承受咗好多唔開心~~~不過學媽咪話齋，已經行到呢一步，無論點到要繼續落去。
好喇，hea到今日就好，聽日開始要繼續努力！！
終於返到嚟喇，去咗leipzig三日。
3號晚八點幾到，一個朋友去車站接咗我同埋小韓，跟著送我哋去住嘅地方，係一個教堂上面，條件幾好嘅，而且仲好平添。一共係4間房，每間房有5個床，去到嘅時候就得我哋兩個人住係入邊，超勁！！
4號小韓要考試，原本諗住話去學校搵個地方練琴，點知去到人哋話，要到考試個日先有琴房畀我練
，唯有陪著小韓去考試囉。佢話佢唔係好鍾意leipzig喎，所以成個人都好relax，不過可能係relax過咗頭，佢係考試嘅時候吹得好差，但係佢都好happy，唔知佢點諗?!
噚日係我考試，可能受咗小韓嘅影響，我一啲到唔緊張。等到考試前兩個鐘先去學校，亦都唔咩練，就咁上去考試，mozart同埋bach都ok，自己覺得樂感有好咗好多，但係bruch就......都冇同鋼琴係埋一切
~~~因為考試嘅人好多，我考完專業要即刻去考其它啲嘢，鋼琴都係冇練就上去考試，beethoven仲聽得過去，但係mozart就好垃圾，不過最後個老師話，我pass咗
~~~後面嘅gehoerbildung同埋tonsatz就更加冇問題，一個攞咗2,1，一個攞咗3,6，到算過咗(註明下，呢度1分最好，5分最差，4分就算pass)。至於專業嘅成績至少要等1個星期先知，不過我冇諗住打電話過嚟問，就等著佢哋嘅信就好喇。
噚晚考試之後，小韓同另外一個同學話要去飲酒喎。我哋去咗酒吧街度食咗晚餐，佢哋一人飲咗一大杯黑啤，不過佢哋仲唔過癮，十點幾有去另外嘅酒吧飲，飲咗好多只酒，一直飲到1點幾，小韓係都要將嗰個人飲倒，搞到我有啲炆~~~返到住嘅地方發覺另外兩間房有人嚟住，好眼瞓，倒到床上就瞓着咗。
今朝8點半醒，跟著我哋坐10點51嘅車返嚟，夜晚6點到咗。好攰~~~聽日要好好休息下，星期一仲要去同carlos上課！
