  |
  
|
噚晚發咗個夢，夢到自己考上學校。當時唔知幾開心~~~不過醒咗就有小小失落~~~唯有希望今次能夠夢想成真喇~~
已經有連續兩日都係夜晚2點瞓，但係朝早7點就醒咗，都算自然醒喇。但係成日到冇咩精神，一直恰眼瞓，今晚個頭仲赤赤痛，睇來今晚唔早啲瞓都唔得~~~
噚日收到duesseldorf嘅信，話7月7號考試喎。講真喇，而家真嘅好希望luebeck呢度能夠考上，如果係咁嘅話，我就唔去其他地方考試囉~~而且仲可以即刻返去添~~~不過前一排同carlos上課嘅時候，佢到講咗，佢唔敢擔保啲咩，而且佢知道咗我要去其他地方考試之後仲講，要我考完之後同佢匯報添。唔知係唔係暗示啲咩哩？！不過佢呢排次次都話我有進步喎！希望一切順利喇！！
(閱讀全文)
噚日聽家姐話嬤嬤入咗院，話好突然，唔知點解。今朝早打咗畀媽咪，佢話遲的先同我講，好快就cut咗線，當時就覺得有啲唔妥。到咗晏啲，家姐係網上同我講有兩個消息，一個好消息，一個壞消息。好消息就係佢呢個星期三就放假，跟著就返汕頭見老豆同埋媽咪；壞消息就係，嬤嬤噚晚已經過咗身。
唔知點解，聽到呢個消息嘅時候好平靜，當時我仲食緊lunch，就係個心跳得好快，過咗一陣就好返。呢個消息真嘅好突然，雖然之前嬤嬤都住過院，但係佢嘅身體一直都好好，冇咩大問題，真係唔知點解會咁？同嬤嬤嘅關係其實都唔算幾好，細個嘅時候仲ok嘅，但係後來佢同爹啲媽咪嗌咗場大交，搞到有段時間仲冇來往添。好似係到咗太嬤嬤過身嘅之後，佢哋先有番來往，雖然話一家人冇隔夜仇，但係之後我同埋家姐都唔係好想睬佢。返去汕頭亦都係媽咪夾硬叫我哋佢睇佢先至去。講真喇，細個嘅時候佢都算幾錫我同埋家姐嘅，得閒佢就帶我哋去公園玩，過時過節仲整啲好好食嘅嘢畀我哋食。仲記得我細個個陣，有一次佢帶我去街，我同佢講，等我大個咗，要賺錢買架飛機帶佢出去玩喎。雖然而家已經幾唔清當時嘅詳細情形，不過依稀仲記得當時佢好開心。不過而家呢個諾言嘅萬分之一都咩完成，佢就咁走咗，呢個稚氣嘅諾言，呢世人都唔可能有兌現嘅機會喇~~~而家真嘅好想食多件嬤嬤整嘅嘢，好想聽下佢把聲。
早幾年，契爺走嘅時候，我亦都冇見到佢嘅最後一面，當時我同家姐仲係北京上學。契爺係爹啲嘅契爸，亦係爹啲以前嘅老師，人瘦瘦嘅，戴副眼鏡。佢以前有同我哋住過一段時間，佢亦都好錫家姐同埋我。當時佢病咗好久，媽咪一直照顧住佢，最後亦都係媽咪送佢走嘅。我哋離去汕頭最後一日同佢影嘅相我一直帶係身邊度，我唔想忘記佢~~~
計埋，啲爹啲同媽咪兩邊已經有三個人過咗身，契爺、三舅父同埋呢次嘅嬤嬤。原來生命真嘅好脆弱，或者係命中注定嘅，不過真嘅好驚身邊有人離開，個種感覺好唔舒服。生死有命，我能夠做到嘅就係珍惜同身邊所有人一齊嘅時間~~~~
噚日收到luebeck嘅信喇~~個考試係六月十三號。仲剩番廿幾日。搵番之前兩個學校嘅信，hamburg係六月二號就考，跟著係leipzig，六月五號考試~~~最後嘅十幾二十日，唔知今次嘅結果會係點
今日練琴嘅時候覺得有啲feel返咗嚟~~~夜啲收到carlos嘅SMS，話聽日唔去theater上課，依然係學校度上。咁又幾好喎，費事聽日去到theater搵唔到佢。
呢幾日小韓都陸續收到啲學校嘅考試通知，到目前佢已經放棄咗兩個學校，因為時間撞車，好彩我當時冇聽佢講，同佢一齊報咁多學校。希望我報啲學校嘅考試時間唔好撞車喇~~~
呢兩日將4輯X-Man都睇咗，好勁~~好希望自己到有啲特異功能
！！呢排一直到好夜瞓，但係朝早都好早就醒咗~~好眼瞓，今晚要早啲瞓。
今朝早醒咗3次，但係都好快又瞓着咗，最後等到10點鐘先醒。因為2點鐘要上課，就諗住11點練琴嘅，但係matthias話要打電話，唯有等到11點半先練囉~~~
兩點鐘去上課，一開始講咗啲嘢，跟著聽咗啲mozart，好似好快就落堂，怪怪哋
。不過佢同我約咗星期四仲要上多次。上完之後聽咗carlos嘅一個韓國學生嘅課，跟著就返到屋企。
夜晚小韓打電話畀我，話要我幫佢寫篇文章喎。佢過幾日要去stuttgart考語言，佢話要我寫定，跟著佢就背好，到時就直接抄上去就好。我真係唔想幫佢呀~~~可能之前幫咗佢太多嘢，佢而家一有咩事就要我幫，連考試都要我幫，真嘅有啲煩佢！！！而且我都唔知stuttgart要考啲咩，如果寫錯咗到時仲麻煩添！！我有心推咗，但係無論我點講，佢都唔理，就係要我幫佢寫。睇來以後真嘅唔可以同啲人交得太深~~我已經有過太多噉嘅經驗喇，但係好似次次都唔記得咗啲教訓
......點算好呀???好煩！！！
又係一個5月12號。已經過咗一年，不知不覺咁時間就過咗去，記得一年前嘅5月12號，我仲係DETMOLD，當時聽講話國內地震，即刻打電話返去畀媽媽，點知電話打極都冇人聽，好彩家姐有上網，當時叫佢打電話返屋企，如果打通咗話畀我知。過咗幾個鐘先收到消息話屋企人都無事。已經過咗一年，雖然城市可以重新建番，但係失去嘅親人係返唔到黎嘅，唯有繼續好好哋生活落去~~~~~
呢幾日覺得有啲混亂。可能係之前去LEIPZIG嘅時候連續兩日冇好好咁瞓(應該話根本就冇瞓)，搞到個生物鐘有啲亂。星期五晚22：10坐火車去leipzig，一路都OK嘅，但係中間轉車嘅時候遇到小小問題，當時已經差少少凌晨1點鐘，我係車上瞓著咗，醒返見到我附近都冇晒人，我以為車已經到咗站，即刻落車睇，點知仲未到，轉身想再上番車上嘅時候，點知車門開唔到，未到10秒架火車就開走咗~~~~我當時好想喊，停係個好細嘅地方，而且完全唔知自己係邊。好彩當時有個人送朋友去坐車，我拉著佢問佢可唔可以幫下我，佢話唯有撘的士，無解喇，如果唔撘的士就趕唔上另外嘅車，最後用咗30幾€撘的士去轉車嘅城市。之後就一齊順利，到咗LEIPZIG上咗嗰個課，覺得有啲嘢好小小問題，不過大部分都冇咩問題。星期六晚就又坐野車返黎，係berlin又等咗4個幾鐘車，不過呢次一啲都唔敢瞓，一直係度睇書。返到嚟luebeck都已經係星期日嘅9點鐘喇，返到屋企原本諗住補返覺嘅，但係後尾都冇瞓到。
尋日去上咗課，感覺到OK嘅~~~carlos話由下個星期開始要收學費，一個星期40€，佢話可能以後一個星期唔會淨係上一次，不過只要一個星期畀一次學費就好喎！點都好啦，同國內比都平啲嘅！上咗三次，自己覺得都有唔少進步囉，carlos亦都話我有變好，繼續努力......
今日原本諗住話好好練琴嘅。不過未到十點，小韓就嚟咗，佢之前同佢嘅prof.打過電話，話今日上課，點知去到學校佢唔係度喎~~~就走來問我，究竟上次講嘅係星期二定係星期四，雖然話上次佢係我呢度打嘅電話，但係我點記得喎。後尾證實咗係星期四先上，上次可能係我講錯咗，搞到佢今日都無上德文，真係抱歉~~~
跟著同佢一齊去搵咗間亞超(仲係香港人開嘅添！)同埋去超市買咗啲嘢，諗住話買完就返得嚟，點知拖下拖下就到咗兩點幾三點。佢話唔畀我走，因為上次嗰個有啲變態嘅廚師又要過來，佢話要我陪著佢，咁我哋兩個有嘢傾，可以扮作好忙，費事理佢！無計喇，唯有陪著佢囉。五點過個廚師就嚟咗，佢買咗唔少嘢，話仲要等同我同屋住個中國人。今晚佢煮咗spagetti，味道都幾好，不愧係廚師！！食完之後，我同小韓就返到佢間屋搵嘢做，佢上網我抱住本書睇，我個同屋住趕著去打波，佢哋兩個未到八點就走咗，小韓同我都鬆晒，真嘅有啲頂唔順佢哋兩個，係佢個度打機打到九點過先返。
今日買咗星期五去leipzig嘅車票，嗰晚十點幾嘅車，星期六朝早到；星期六晚就坐車返黎，睇來兩日冇得瞓，希望能夠頂得住喇，不過頂唔住都要頂住，最多星期日返到嚟好好咁瞓一日補返數囉······
。