今日成日冇練琴~~~朝早依然係7點鐘就醒咗，打咗陳機，啱啱想練琴個陣，小韓就打電話畀我，叫我同佢一齊去買書。無計喇~~~唯有陪佢去。到咗書店門口仲撞到尋日佢係wissen度嘅一個老師添，傾咗小小偈。

跟著返咗屋企，佢要去搵個prof.上musikwissenschaft，我返到屋企已經就十二點喇，過咗12點就練唔到琴，唯有搵嘢食lunch~~~到咗下晝完全冇心機練琴。過咗三點小韓又打電話嚟，話要去send兩張賀卡畀佢老母同埋未來嘅外母。同佢send完賀卡，有個佢哋教會嘅人要嚟睇佢間屋，諗住話無事我可以返去好好打機啦啩?點知啱啱講完BYE，仲未行到200m就畀佢叫住，話今晚叫我同佢哋一齊食，冇所謂囉~~~就同佢哋一齊買咗嘢，跟著返佢屋企。嗰個人我之前都有見過一次，真嘅唔知應該點講佢。佢一直講啲聖經上面嘅嘢，係呢邊見過唔少教徒，冇一個似佢咁嘅。不過點講都係個廚師，煮嘅嘢真嘅好好味~~今晚黐咗餐勁嘢！！

食完之後，我諗佢應該差唔多就走喇。點知佢話要幫小韓滷牛肉喎。趁著煮緊個陣，佢就唔停咁講開佢哋教會嘅事。小韓聽唔到一陣就話肚痛去廁所，淨番我係度，嗰個人就唔停咁同我講，聽個意思係唔將我拉入基督教就唔罷休，真係冇嘢講。我由一開始就已經同佢講明咗，我係佛教徒，而且唔係講下講下嗰啲，我係好認真嘅。但係佢就一直咁講一直咁講。一開始仲忍住聽，後尾實在忍唔住，就同佢講開。點知佢點極都唔明，我同佢講到十點幾。最後小韓都忍唔住，雖然佢都係基督教徒，但係佢都睇唔慣個人咁。我哋一直同佢講，一講就講到1點鐘，我睇好夜啦，就話冇阻住小韓休息。要返去喇。我諗如果我唔講嘅話，佢可能要一直坐到天光。真嘅未見過咁嘅人，之前幫我啲人都係基督教徒，但係冇邊個似佢咁嘅~~唉......而且佢自己都未必完全明白基督教嘅教意，而且對佛教都淨係知啲唔知啲，就亂咁講，真嘅頂唔順，佢仲話希望我以後會有機會參加佢哋嘅查經班。諗都唔使諗！！！我呢世人係唔會改變我嘅信仰嘅！！

今朝早7點就醒咗~~~呢幾日唔知點解好早就醒咗！十點過開始練琴。十一點小韓(即係個同學)打電話畀我，話一陣佢要去stadtwerke度交份嘢，要我同佢一齊去······十一點半去超市買嘢，今日唔知點解，好似對錢嘅問題都好頭痕~~~去超市買嘢，無論點數，畀嘅錢到唔啱~~~

十二點同小韓去佢屋企樓下食咗Lunch，跟著就去咗stadtwerke，都冇幾遠啫。佢話佢晏晝4點要去wissen度做個test，要叫埋我一齊去！家陣去做咩都要我同佢一齊去喎~~~有冇搞錯呀?!返屋企又練咗一陣，4點去到wissen度，真嘅冇諗過佢嘅德文噉差......佢做test嘅時候同個老師傾咗陳偈，等到佢做完test就一齊傾。一切都冇咩問題，但係喺學費嘅問題上搞咗好長時間，最尾都係佢自己諗咗個方法先搞掂~~~

6點半去上專業課，carlos話我有好啲！！不過已經有排冇上2個鐘嘅課啦，好攰呀~~~8點半過先返到屋企~~~有老師上下課真嘅好唔同！繼續努力！！！

今朝早同同學去VHS度報名，點知佢哋而家冇課，要等到8月先有喎。跟著就同佢去另外嗰間係市中心嘅語言學校度睇下，個度要先考試喎，佢留低咗電話，要等個度嘅老師打番畀佢。

今晚做咗件好勁嘅事！10點鐘嘅時候，自己幫自己剪咗頭髮~~~~之前一直唔敢自己幫自己剪，因為係國內嘅時候就差啲搞到要光頭見人。今次好小心嘅剪，都OK嘅~~~自己好滿意！！

今早10點半至醒~~~原本仲諗住今朝早練琴添！沖完涼收到朋友嘅電話，話要去外管局度改個地址，跟著可能要去買嘢。

十一點佢到咗我樓下，跟著陪佢去外管局改咗地址，買完嘢之後佢話肚餓，但係又唔想返去煮喎~~啱啱好超市隔離有間印度菜館，佢話想係個度食lunch。冇計啦，雖然唔係好想係出邊食，因為啲嘢都唔平，但佢都已經講咗，唯有陪佢係度食囉。之前有係嗰間菜館食過一次，就係幫佢個同屋住嘅台灣人搬屋個陣，覺得啲咖喱都ok，今次依然叫咗份咖喱雞同埋飯。食完就同佢去銀行改咗地址，跟著我去車站攞返架單車，嗰日去接佢嘅時候要幫佢攞嘢，就將假車擺咗係車站度。

聽日要同佢去VHS度報名喎，佢話自己唔係好想去上課，硬係要拖著我一齊去。都好嘅，反正成日冇咩嘢做，多學啲嘢都幾好喇~~~~

今朝早8點鐘就醒咗，但係仲好眼瞓，醒咗兩分鐘就繼續瞓~~~後尾因為樓下裝修好嘈，先至完全醒咗！拉開窗簾見到出邊好暗，今日個天睇來唔會好好！

十點過食完早餐，個德國人都出咗去，就決定執間屋。尋日個朋友將佢啲嘢都攞走晒，雖然空咗啲，但係好亂！！執咗成兩個鐘先完全執好。呢間屋由我住入來都仲未好好咁執過，今日用吸塵器將啲角落都吸咗，呢度好多蜘蛛呀~~好多地方都有蜘蛛網，我最憎呢啲嘢！！！吸好咗之後將啲傢俬重新擺過，執完覺得間屋好似大咗啲......不過好攰呀，又成身汗~~而且好肚餓，煮咗啲粥食咗之後好咗好多，睇住間屋個心情到好咗好多！！

下晝比較認真咁練咗陳琴，好似搵到少少feel~~~~5點幾個同學打電話嚟要我同佢一齊去超市喎~~~一出去就開始落雨，而且係一陣陳咁，今日一直係一陣陳噉落，好煩~~~希望聽日個天會好番啦！！！

今日8點半醒咗。醒咗之後第一件事就係睇個電話，因為之前個同學話今日要嚟我呢度攞佢啲嘢，點知噚晚個電話冇咗電添，嗱嗱聲換咗個電池，開機就見到個同學已經打過電話畀我~~~打番畀佢，點知無人聽，去沖咗個涼，返嚟食緊玉米片嘅時候就收到佢個電話，話過緊嚟，要我等埋佢一齊食喎······過咗一陣佢就過嚟，仲買咗啲麵包嚟，講真啦，我而家見到麵包就好想嘔，但係人哋買嘅，我到唔好話唔食喇，硬係噉食咗一個，仲有一個就袋住先喇，聽日至食！！

食完嘢之後，佢執咗兩箱嘢，同埋一個好大嘅包，我就幫佢攞過佢嘅新屋度，兩箱嘢好重呀，好彩佢有架可以拖著啲箱嘅車仔，都唔會好辛苦。過到佢個邊，佢一路同佢女朋友係QQ度傾偈邊執嘢，而且我都有小小恰眼瞓(噚晚兩點幾至瞓)，搞到我有少少嬲，執咗成個鐘都冇見佢執好啲咩~~好彩後尾佢同佢女友話要執屋，跟著就好快咁將啲嘢執好晒。佢帶咗好多我覺得冇咩用嘅嘢嚟喎，不過人哋係有錢人喇，我又點能同人比啫？！佢執完之後，我哋就去咗佢樓下嘅快餐店食咗啲嘢，原本我諗住自己買嘅，點知佢係都要請我喎。其實又唔係幾多錢，兩個hamburger同一杯汽水啫！但係佢話我幫咗佢咁多，唔通我要叫佢請我食大餐咩？就咁我就畀佢埋單囉~~食完之後繼續過我度搬嘢，又執咗兩箱嘢、兩袋嘢同埋一大包即食面，我哋又搬咗過去，真嘅好攰呀！！！不過呢次佢冇同人係網上傾偈，所以好快就執好咗，我都一路有幫佢執啲嘢。執完之後佢話，要打個電話畀佢女友，聽佢哋傾電話先知，原來佢斷咗網，所以冇收到佢女友嘅消息。我話點解佢會咁好，冇邊傾偈邊執嘢~~~佢仲係度教佢女友德文喎~~真係，佢自己德文都係麻麻哋啫，都係要問我先教佢女友~~~(其實我嘅德文都唔係好好，不過好過佢好多，而且佢女友問嘅問題都好簡單嗰啲，如果唔係我都唔一定識答.......)講咗差唔多十分鐘咁佢就收咗線，因為佢仲有嘢未攞完，仲要行多一次先得，而且佢仲要去超市度買嘢。最後啲嘢好輕鬆，就係佢個樂器、個電飯煲、個細嘅洗衫機同埋啲零散嘅濕碎嘢，攞過去之後亦都好簡單就搞掂咗，不過都係嗰句，佢真嘅有好多冇咩用嘅嘢。

跟著我哋去咗rossmann買嘢，原本佢諗住話要煮啲好嘢食，但係行到佢肚餓先發覺已經7點幾啦~~~但係睇個天仲好光，佢都未買食嘅嘢，淨係買咗啲日用品。我哋就係街邊求其咁搵咗間doener店食咗啲嘢。幫佢將啲嘢攞返佢間屋度，佢間屋原本就好大，雖然佢好多嘢，但係執咗之後真嘅好齊整，搞到我到想同佢換屋住.......等到佢洗完個地毯我就返嚟啦~~今日流咗成身汗，攰到死！！！

聽日要開始畀心機練琴喇~~~下個星期一仲要上課，要畀carlos見到我要變好先得！！如果唔係就死喇~~~

今日晏晝去見咗carlos。佢好似呢幾日有啲過敏，一直係度咳。同佢傾咗一陣，講下講下佢攞咗疊紙出嚟，上面紀錄咗上次考試嘅嘢，跟著拉咗啲曲畀佢聽，佢講咗好多嘢，先知原來我有咁多問題！！不過佢話因為edinger嘅關係，佢話唔可以話nein，所以都同我上咗個來鐘。跟著同佢一齊行返屋企，佢住嘅地方離我唔係好遠啫。

同佢講咗再見之後一睇電話，有10個未接電話，原來係個同學已經到咗，返到屋企放低個琴就即刻踩單車去火車站接佢。佢真嘅肥咗好多，果然係國內嘅生活好啲······聽日仲要幫佢將啲嘢搬過去同埋幫佢執間屋，唉~~~係火車站打咗畀carlos，同佢約咗下個星期一去上第二次課，佢竟然話唔使錢喎~~不過可能遲的要畀啦！冇可能冇學費嘅？！

又有好幾日冇嚟呢度寫日記，呢幾日到冇咩特別嘅嘢發生。日日都係屈係間屋度打機，除咗冇嘢食嘅時候去超市度買嘢個陣先會出街！

呢排同個同屋嘅中國人嘅關係好似越來越陌生咁。唔知點解，我好似越來越煩佢，冇咩事都同睬佢。之前講咗兩次話要幫我剪頭髮，但係後尾都冇剪到，我都唔知係佢嘅問題定係我嘅問題。其實之前佢唔係度嘅時候，嗰個德國人嘅朋友嚟咗，佢哋傾偈個陣我聽德國人嘅意思好似都對佢有啲意見，但係唔知點解，佢哋兩個平時都好多嘢傾，有時仲一傾傾成嗰鐘咁。人同人之間嘅關係真嘅好難搞！！

晏晝我煮嘢食個陣，個德國人要出去，佢見我係廚房，就同我講，話真嘅好出奇，佢都未見過有邊個Mitwohner同我咁，成日屈係間屋度，無論外面嘅天氣有幾好，除咗買嘢就冇見過我出去。我當時都唔知同佢講咩好，我唔似佢哋喎。佢哋可以去學校，有自己嘅嘢做，我而家除買嘢仲可以去邊啫，唔同無事做係街度行咩。咁我情願屈係間屋度，而且我份人就唔鍾意行街。唉~~~唔知點解，聽完佢講嘅說話，個心好唔舒服，唔通我真嘅鍾意咁咩?!我都想好順利咁考到個學校，跟著可以有嘢做。希望聽日同carlos傾得埋啦，咁至少每個星期都應該有嘢可以做！！

聽日個同學就返嚟囉~~~佢啲嘢終於可以攞走喇~~~而且佢報名嘅事都唔使我再擔心喇！！不過望係咁望喇！！前幾日幾個學校都將啲報名嘅材料send返嚟，話佢嘅材料有問題，跟著我就即刻將新嘅材料send咗過去，都仲未知得唔得~~~

尋日諗住去學校搵pro.嘅電話，點知尋日佢哋仲放緊復活節嘅假，成條街見唔到幾個人。噚晚煮飯嗰陳，matthias同佢女朋友話要玩個遊戲喎，就係佢哋將啲marzipan收埋係間屋度，跟著要去搵，畀邊個搵到就係邊個嘅，好似係復活節嘅遊戲咁。我搵到三個，雖然之前食過，唔係好鍾意，不過都好多謝佢哋囉~~~~

今日終於去學校攞到carlos嘅電話，同埋幫同學將佢嘅lebenslauf交咗(之前報名嘅時候明明記得有交，但係收到信話冇交喎?!)。跟著去咗銀行，都係好矛盾，唔知要唔要報嗰個vorbereitungskurs，最後都係冇報，跟著去copyshop度打咗同學APS份證明，之後就將寄咗出去！同呢個同學同屋住嘅臺灣人話，我個同學真係好輕鬆喎，學校啲事我都幫佢搞掂咗，住嘅地方啲手續又係佢去搞嘅，我同學返到嚟就咩事到冇~~~其實諗諗下又真係喎，佢咁輕鬆，而家仲可以係國內享受，成日仲擺啲同佢女朋友好sweet嘅相係校內度。前幾日係網上見到佢，佢仲同我呻，話點解佢啲事咁麻煩！！真係同人唔同命呀~~~

晏晝打畀carlos，點知飛到去留言。今晚食完飯突然決定去銀行，將20€報名費過咗畀leipzig度。其實可能真係諗得多得濟，一直好猶疑，咁都幾好呀，唔使再諗！！返黎之後再打畀carlos，啱啱好佢係度，大概咁傾咗下，約咗下個星期一下晝去學校度見下，到時最詳細啲傾。希望佢可以接收我囉，咁下次考試就冇咩可以擔心啦！！不過無論點，到至少有咗啲希望囉。而家唯有盡人事，聽天命啦！！

今日係復活節，原本諗住會係屋度屈一日嘅，不過晏晝煮飯個陣，matthias問我有冇去過學校隔離嗰個kirche上面睇過，話佢同佢女朋友遲的要去，如果我冇咩嘢做嘅話可以同佢哋一齊去，我當時就應承咗，反正到得閒，而且個天又咁好。

到咗四點佢哋先至話出去。同佢哋去到個度，次次去學校嘅時候都經過嗰個教堂，但係從來冇諗過入去睇下。入到去，matthias同我講，呢個教堂係雖然係好古老嘅，但係而家已經唔當教堂用喇，變成咗個好似文化中心咁，係大堂度淨係見到啲造型好古怪嘅模型，跟著就去塔頂，要買fei嘅。學生係2€，成人係3€，matthias冇帶佢嘅ausweis，我根本就冇。跟著佢走去同個賣fei 嘅人講，最後用佢女朋友嘅ausweis買咗三張學生fei !!出門口個陣時佢話要請我喎，不過算啦~~我都係自己買fei 好啦~~又唔係幾貴!!!上到塔頂就見得到成個lübeck，之前我都有聽人講過，但係到冇嚟過。風好大，有啲似去大雁塔上面：可以見到成個城市，同埋...好大風！！用手機影咗幾張相。都幾好嘅~~

轉咗幾個圈之後就返咗落嚟，係教堂前面嘅空地傾咗陳偈，跟著佢女朋友話要食雪糕。跟著我哋行返嚟，係路上嘅一個雪糕店一人買咗一個雪糕，matthias話想邊曬太陽邊食，就行到隔離嘅廣場度。講真喇，我到好鍾意啲日光！！呢幾日嘅日光到超勁，搞到我好想將啲被同埋啲衫攞到出面曬下，好似嚟到呢度之後，我啲衫到冇曬過，次次都係洗好之後放係屋入邊風乾嘅，好掛住啲畀日頭曬到有啲硬，同埋有日光啲味道嘅衫。不過講多句，夏天真嘅已經嚟咗喇~~係街頭見到好多人到已經着著啲短衫短褲。前幾日打畀媽眯，佢仲話汕頭好凍！有啲想叫媽眯嚟呢度......