  |
  
|
今日收到duesseldorf嘅信喇！！北京個朋友同我講，話佢已經收到咗，我即刻落樓去check信箱，果然見到有我嘅信。當時見到好大一封，仲以為係將我啲報名嘅材料寄咗返黎添，拆開咗發現唔係喎，入面有好多張紙，攞出黎一睇，係我恨咗好耐嘅zulassung!!
返到嚟超激動~~恨咗咁耐，終於算係有啲結果喇！！
不過睇真啲，入面好多嘢我都唔係好明，打畀JK姐，約咗今晚去佢度，佢幫我睇下。
下晝係網上同媽咪視像講咗呢個消息畀佢知，佢勁開心！！而且即刻打電話畀啲舅父同埋阿姨佢哋，佢哋到好開心。其實恨咗咁耐，就係想見到媽咪開心啫~~我仲叫佢聽日要買啲嘢去酬神添。呢排真嘅覺得呢點嘢好有用嘅~~
晏啲去咗JK姐度，佢幫我睇哂啲信，發覺又有大把嘢要愁。上次已經寄咗畢業證書同埋APS過去喇，但係呢次有問我要，而且仲有個咩bachelor嘅嘢，連JK姐都唔知係咩。聽日同學校聯絡下先。不過最麻煩嘅仲係B2嘅證書，唔知點算，唉~~~
返黎係網上睇咗duesseldorf嘅房，都好貴，200幾300€一個月。睇來個度嘅消費真係高到冇得頂！！
聽日先去攪掂嘅visum先，希望一切順利喇~~~
噚晚2點幾，終於返到luebeck，好攰呀~~計下，6號走嘅，15號先返黎，第一次走咗咁耐！
呢幾日都幾奔波嘅。先去咗duesseldorf一日，跟著去mannheim住咗5日，跟著又返到duesseldorf住咗2日。原本冇諗住出去咁耐，但係duesseldorf嘅專業過咗，要14、15號再去考其它嘅嘢，所以就有多住咗幾日。不過好彩，係duesseldorf識咗一個北京嚟嘅朋友，係mannheim嘅幾日好彩有佢，如果唔係真唔知上個星期日點過。
duesseldorf嘅專業考試唔知點解，入去就好緊張，連手都震埋，不過最後竟然過咗，而且仲有個pro.要咗我。視唱好簡單，樂理唔知點樣，因為好多嘢唔係好明，而且國內學嘅同呢度仲有啲唔同。鋼琴考得都ok。而家就希望有位置畀我囉！！
mannheim嘅考試麻麻哋，覺得同上次相比，有好有差。專業嘅音樂表現得多咗，但係paganini拉得唔係幾好，其它都ok。
今日返黎就有大把嘢做，幫小韓辦咗visum嘅嘢，走咗3次，最後都算搞掂咗。仲係好眼瞓~
噚日考咗專業，一共40個人，我排係第31個，下晝3點幾先到我。
入咗去覺得，入邊好凍呀，因為入邊開咗冷氣。mozart拉得都算OK，有做音樂，不過有一個takt左手唔知點解冇跟上，乾脆就混咗過去。bach應該算最正常嘅啩，冇咩毛病，應該都冇咩特色啩?!paganini拉得唔係幾好，自己覺得冇上次考試好......視奏唔係冇難，前幾行仲講得過去，後面嘅就有啲~~~
今日考鋼琴同埋樂理。
鋼琴依然唔係幾好，之前明明練得好好哋，但係入去見到琴鍵個腦就一片空白！！斷咗幾次。樂理視唱可能係考過一次嘅關係，覺得唔係好難，定係話呢排我嘅樂理視唱有進步??
下晝考完我就同北京個朋友一齊去行街。啱啱好有嗰pop嘅比賽，成條街都係人，我哋都去睇咗下。跟著就去mcdonald's度買啲嘢食，坐咗個嚟鐘，後來又去超市買咗啲水，因為聽日超市唔開門。返到DJH去佢間屋傾偈，佢間屋就得佢一個，超勁。傾咗成個鐘我就返房喇。
講嚟都奇怪，今次考試識咗好多人，而且都係我自己一個出嚟嘅時候識嘅！聽日都唔知點過，到處都唔開門......後日去duesseldorf，希望一齊順利！
噚晚未到10點就熄燈瞓覺，朝早6點半聽到手機響就醒咗。
八點三未到就到咗學校，琴房有開，而且冇咩人。霸咗嗰琴房就開始練。9:22嘅時候有個中國人話就要考試喎，唔就畀咗間琴房佢練先，過咗一陣返去，發覺又有另外一個中國人係入面，佢11點半考試喎，算數，畀佢繼續練，我繼續去踩馬路。
講來又幾奇怪喎，食早餐嘅時候就開始落雨，等我到咗學校就開始落暴雨，但係等到我要去踩馬路嘅時候就停咗喎~~~呢幾日因為落雨嘅關係，我對鞋都有陣發霉嘅味，麻煩！
11點半返去，終於冇人喇。繼續練，專業同鋼琴一齊練。等到快2點嘅時候，實在唔想練，就將琴放返旅社，跟著繼續去行街。不過係5點幾個陣行過學校前面，撞到前幾日係duesseldorf識嘅個北京女仔，而且佢同我住一間旅社添。睇來呢幾日有伴啦，唔使驚悶！
噚晚快1點先瞓，但係今朝6點半就自己醒咗。食完早餐之後，行去超市買咗支水，跟著返到房hea到10點半過先去check out，又係火車站等咗個嚟鐘。
由早晨醒咗之後，個天一直係落雨，而且仲唔細添。好彩我去火車站個陣冇落，如果唔係我就慘喇，又冇帶遮喎！坐上火車，一路上亦都落緊雨，不過都唔係好大，而且仲係一陣一陣咁。火車一路沿著莱茵河開，到咗mannheim，好熟就搵到住嘅地方。要咗間人少嘅房，係頂樓，都幾好，至少畀上次住嘅個間好啲。入去嘅時候仲冇人，佔咗個幾得意嘅床，好似北方個啲炕。執好嘢就去搵地方食晚飯，食咗個doener teller，勁大一碟，最後都剩番少少食唔落，花咗6€。
係出邊行到6點過先返到房，嚟咗一個德國人，佢竟然係bielefeld人，之前我仲係個度讀咗3個月德文添。傾咗陣偈，佢話我嘅德文好好，有啲小開心~~~
希望聽日學校有得練琴喇，如果唔係就會無聊死......
噚晚定咗6點嘅鬧鐘，但係醒嘅時候已經係6點半喇~~七點三同個朋友去食早餐，8點左右搭上地鐵。到學校嘅時候仲冇咩人，搵咗下考場，正好撞到琴房管理，開咗琴房我哋兩個人就入去，一直練到9點，去報名，我排係11：10考試，個朋友係我後面。
唔知點解，呢次考試好緊張，或者係因為算係最後兩分之一嘅機會啩?!個心真嘅好擔心考試嘅結果。考試推遲咗差唔多半個鐘，到我嘅時候到11點半過。鋼琴伴奏係個幾得意嘅人，到我嘅時候，佢同另外一個教授一齊出去唔知搞咩。我入去咗之後係入面企咗一陣，入面有個教授一直望住我笑，搞到我有啲毛毛哋~~原本就好緊張，咁一嚟我更加緊張。連手都震埋......
考完等到2點幾，個朋友有識一個教授，而且仲係中國人添~~~佢出來之後話畀我哋知，我哋都pass咗！有一個教授收咗我，聽到佢咁講個心好啲。不過都係好擔心，唔知後面嘅考試會點?!仲要繼續努力！！！
朝早6點就醒咗，不過拖到6點半先起身。8點過出咗門口，個天好似要落雨咁，但係都幾舒服嘅。
準時坐上火車，上車就開始聽歌。唔知點解，心情好唔down，耳機中傳出《阿嬤的話》呢首歌，眼淚不知不覺就流咗落來。真嘅好難受，亦都好擔憂，個天好似知道我嘅心情咁，雨水一滴一滴打係個車窗上......
hamburg嘅車遲咗，原本以為趕唔上dortmund嘅ICE，但係最後都係趕上咗。到duesseldorf好準時，酒店亦都好好搵。諗住去搵下學校，但係啱啱行出酒店就開始落雨~~~無解，係一個超市入面買咗個朱古力同埋係個度避雨。
大城市就係大城市，呢度啲人好鍾意講英文，而且呢度通街都見得到亞洲人，仲有好多亞洲嘅商店。
去火車站接咗個朋友就坐地鐵去學校，一睇先知，原來今日已經考咗4個鐘頭，更加擔心，唔知聽日嘅考試會點？！好驚呀，唔想令屋企人再次失望......
聽日開始就要離開一個星期喇。
唔知點解，今日下晝開始好驚，驚考試嘅結果，驚到時要去私立嘅學校，驚好多好多......以前從來都未有咁大嘅反應。真嘅，好驚~~~驚到好想喊，今日晏晝就已經忍唔住喊咗一次，而且呢兩日聽到一首閩南語嘅歌，叫《阿嬷的話》，唔知點解，次次聽到自己好想喊，但係就算咁都一次次咁聽。
一直都覺得自己好堅強，從決定要嚟德國開始，所有嘢我都自己搞，所有手續冇叫爹哋幫過。但係呢幾日先知，原來我冇我想像中咁堅強，我都好想身邊有屋企人係度，好多嘢想叫佢哋幫手，好想黐係媽咪身邊，好想同家姐嗌交，最後要佢氹返我。我真嘅好想咁~~~好想爺爺同埋嬤嬤，想食嬤嬤買嘅香蕉，想食爺爺炒嘅花生，雖然而家爺爺病咗，冇可能再炒花生。我真嘅好想返返以前細嘅時候，唔需要諗好多嘢，萬事有媽咪係度啊。我真係好掛住佢哋......
呢幾日情緒起伏好大~~~今日晏晝去小韓度食lunch，原本都好哋哋嘅，但係去到就突然冇晒胃口，就食咗少少嘢。跟著同佢一齊睇咗《死神來了Ⅲ》，好耐冇睇呢點有小小恐怖嘅電影喇。
練咗陣琴就冇練，唔知點解，今日個腦成日諗啲好衰嘅嘢，搞到自己成日都好想喊，但係冇眼淚流。5點半同媽咪視像都冇乜心機，傾咗一陣就收線。同家姐講起，佢話佢今日心情都唔係幾好，可能真係有心理感應，次次佢心情唔好嘅時候，我心情亦都唔會幾好。佢話要我唔好諗咁多嘢，剩低嗰兩個學校好好哋去考。講係噉講啫，我之前都係咁諗嘅，但係就係控制唔到自己，成日會諗啲衰嘢。好煩！！！
